"Bechos Raros" curtametraxe gañadora do concurso de guións de CurtoCircuito´06.
21-10-2006 O acordo de colaboración entre a Consellaría de Cultura e Deporte e o festival CurtoCircuito´06 estabeleceu que a administración comprometeríase en apoiar a produción da curtametraxe gañadora do concurso Compostela Plató, dentro do III Festival Internacional de Curtametraxes de Santiago de Compostela, CurtoCircuíto´06. Este compromiso atópase na liña de apoiar á produción e a novos creadores no sector audiovisual.
"Bechos Raros" está baseada no guión escrito por Estíbaliz Burgaleta e Alegría Collantes, ámbalas dúas residentes en Madrid e que presentaron o guión baixo o pseudónimo de "Ornitorrico". Foi seleccionado polo xurado do premio de entre os preto de 150 textos enviados a concurso desde todo o territorio estatal. O guión de "Bechos Raros" baséase formalmente no xénero documental, parodiando o “estilo National Geographic”, para crear unha atmosfera de comedia arredor da vida de tres inadaptados sociais que intentan arranxarse para poder vivir en sociedade. Coa voz constante do narrador, o que se oe e o que se ve, o ritmo da historia e dos diálogos, a caracterización dos personaxes… todos os elementos por separado son abordados coma un documental, e a súa mestura completa acada un ar de comedia.
O xurado, composto por personalidades do eido audiovisual e literario, -Álex Sampayo, director e guionista; Llerena Perozo, produtora; Isabel Blanco, actriz; Jorge Coira, director; Manuel González, asesor de Comunicación Audiovisual da Xunta de Galicia; Emilio Vila, xefe de realización da TVG; Julio Casal, produtor e coordinador do Festival; e Antonio Mugico, coordinador executivo do Festival.- quixo facer fincapé na grande calidade dos traballos recibidos a concurso e agradeceu a todos os concursantes a súa participación, tras facer público o seu veredicto.
A curtametraxe gañadora conta co apoio da Consellería de Cultura e Deporte da Xunta de Galicia, enmárcase no III Festival Internacional de Curtametraxes de Santiago de Compostela, CurtoCircuíto’06; unha iniciativa de Santiago de Compostela Film Commission, dependente de Incolsa-Turismo de Santiago, apoiada polo Concello de Santiago de Compostela, xestionada por Ficción Producciones.
Mais haberá que agardar ata o vindeiro día 21 de outubro para poder asistir á estrea internacional de "Bechos Raros", e poder ver o filme en primicia, dentro do Gala de Clausura e Entrega de Premios de CurtoCircuíto´06.
